वरिष्ठ पत्रकार तथा पूर्वमन्त्री दाहालको निधन

काठमाण्डौ – नेपालको प्रजातान्त्रिक आन्दोलनका योद्धा, नेपाल पत्रकार महासङ्घका पूर्वसभापति एवम् पूर्व मन्त्री होमनाथ दाहालको गएराति निधन भएको छ । घुँडासम्बन्धी समस्याबाट पीडित दाहालको ८४ वर्षको उमेरमा निधन भएको हो ।

काठमाण्डौको मैतीदेवी निवासमा दाहाललाई हृदयाघात भएपछि उपचारका लागि वीर अस्पताल लगिएको थियो । उहाँको आजै पशुपति आर्यघाटमा अन्तिम संस्कार गरिने वरिष्ठ पत्रकार पुरुषोत्तम दाहालले जानकारी दिनुभयो ।

१९९८ साल कात्तिक २५ गते ओखलढुङ्गाको साविक वरुणेश्वर गाउँ विकास समिति–३, रामपुरमा जन्मिएका दाहालले नेपाली कांग्रेस ओखलढुङ्गाको जिल्ला सदस्य तथा तत्कालीन नेपाली कांग्रेस (प्रजातान्त्रिक) को केन्द्रीय सदस्यसमेत भएर जिम्मेवारी सम्हाल्नुभएको थियो ।

२०५६ सालमा ओखलढुङ्गा क्षेत्र नम्बर–१ बाट सांसद निर्वाचित भएपछि २०६१ सालमा कृषि तथा सहकारी मन्त्री बन्नुभएको थियो । गोरखापत्र संस्थानका पूर्वअध्यक्ष तथा महाप्रबन्धक पत्रकार दाहालले नेपाली पत्रकारिता क्षेत्रमा विशिष्ट योगदान पुर्याउनुभएको छ । उहाँका श्रीमती अनि दुई छोरा छन् ।