गगन र विश्वप्रकाशको नेतृत्वमा महाधिवेशन हुँदै , तर सभापति देउवाबाट निम्तो अस्वीकार

काठमाडौँ । नेपाली कांग्रेसको दोस्रो विशेष महाधिवेशनको सम्पूर्ण तयारी पूरा भएको छ, तर पार्टी सभापति शेरबहादुर देउवाको सचिवालयले महाधिवेशनको निम्तो पत्र बुझ्न अस्वीकार गरेको छ ।आइतबारदेखि सुरु हुँदै गरेको विशेष महाधिवेशनका लागि देशभरबाट महाधिवेशन प्रतिनिधिहरू काठमाडौं आइसकेका छन् ।

शनिबार दिउँसो विशेष महाधिवेशन अतिथि स्वागत तथा सत्कार समितिका संयोजक रामपल्टन साह निम्तो पत्र बुझाउन सभापति देउवा निवास महाराजगञ्ज पुगेका थिए, तर देउवाका स्वकीय सचिव भानु देउवाले निम्तो पत्र बुझ्न अस्वीकार गर्दै साहलाई सभापतिसँग भेट्न नदिई फिर्ता पठाएका हुन् ।

साहले देउवा निवासमा भएको घटनाबारे जानकारी दिँदै भने, ‘मैले देउवा निवासमा गेट खोलेँ । त्यहाँ  मुख्यसचिव कृष्णप्रसाद पौडेल पनि हुनुहुँदो रहेछ । उहाँलाई चिठी दिएँ । मलाई उहाँले किन चिठी दिने सभापतिजीलाई नै दिनुस् भन्नुभयो । त्यसको केहीबेरमा सभापति देउवाका स्वकीय सचिव भानुजी बाहिर निस्कनुभयो। उहाँलाई चिठी दिएँ, पढ्नुभयो । पढेपछि उहाँले चिठी मेरै खल्तीमा हाल्नुभयो र तपाईंलाई लाज लाग्दैन, बाहिर जानुस् भन्नुभयो ।’