सुडानको अस्पतालमा आक्रमण, १३ बालबालिका सहित ६४ जनाको मृत्यु

उनका अनुसार उक्त आक्रमणमा आठ स्वास्थ्यकर्मीसहित ८९ जना घाइते भएका छन् । आक्रमणका कारण अस्पतालको बालरोग, प्रसूति तथा आकस्मिक कक्षमा गम्भीर क्षति पुगेको छ, जसले गर्दा अस्पताल पूर्ण रूपमा सञ्चालनविहीन भएको छ र शहरमा अत्यावश्यक स्वास्थ्य सेवा अवरुद्ध भएको छ । टेड्रोसका अनुसार यस घटनासँगै सुडानको युद्धका क्रममा स्वास्थ्य संस्थामाथि भएका आक्रमणसँग सम्बन्धित मृतकको संख्या २ हजार नाघेको छ ।

करिब तीन वर्षदेखि जारी सुडानी सेना र अर्धसैनिक र्‍यापिड सपोर्ट फोर्स (आरएसएफ)बीचको द्वन्द्वमा डब्लुएचओले २१३ वटा आक्रमणमा २ हजार ३६ जनाको मृत्यु पुष्टि गरेको छ । आक्रमण कसले गरेको भन्नेबारे तत्काल जानकारी प्राप्त भएको छैन ।

सुडानी सेना र आरएसएफबीचको युद्ध सन् २०२३ अप्रिल मध्यतिर शुरू भएको थियो, जसले व्यापक हिंसा निम्त्याउँदै विश्वकै तीव्र गतिमा फैलिएको मानवसिर्जित मानवीय संकटमध्ये एक अवस्था सिर्जना गरेको छ । यस क्रममा हजारौं मानिस मारिएका छन् भने १ करोड २० लाखभन्दा बढी मानिस विस्थापित भएका छन् ।

दुवै पक्षमाथि युद्ध अपराध तथा मानवताविरुद्धका अपराध गरेको आरोप लागेको छ । विशेषगरी आरएसएफमाथि डारफुर क्षेत्रमा संयुक्त राष्ट्रसंघका विज्ञहरूले नरसंहारको संकेत देखिने अत्याचार गरेको आरोप लगाएका छन् ।

टेड्रोसले भनेका छन्, ‘पर्याप्त रगत बगिसकेको छ, पर्याप्त पीडा भोगिएको छ । अब सुडानमा द्वन्द्व कम गर्ने र सर्वसाधारण, स्वास्थ्यकर्मी तथा मानवीय सेवामा संलग्न व्यक्तिहरूको सुरक्षा सुनिश्चित गर्ने समय आएको छ ।’