सिरियामा आइएसआइएस(ISIS) ठेगानामाथि भीषण आक्रमण

अमेरिकाले सिरियामा रहेका ISIS का दर्जनौँ ठेगानामाथि ठूलो स्तरको प्रतिशोधात्मक आक्रमण गरेको छ। अमेरिकी रक्षा सचिव Pete Hegseth का अनुसार शुक्रबार गरिएको यस सैन्य कारबाही गत साता सिरियाको पाल्माइरामा तीन अमेरिकी नागरिकको हत्या भएपछि गरिएको प्रत्यक्ष जवाफी कदम हो।

अमेरिकी सेनाको केन्द्रीय कमान्ड United States Central Command (CENTCOM) ले दिएको जानकारीअनुसार उक्त आक्रमणमा ७० भन्दा बढी आईएसआईएस लक्ष्यहरू निशाना बनाइएका छन्। कारबाहीका क्रममा १०० भन्दा बढी हतियार प्रयोग गरिएको थियो, जसमा एफ–१५ र ए–१० लडाकु विमान, अपाचे आक्रमण हेलिकप्टर तथा HIMARS रकेट आर्टिलरी प्रणाली समावेश थिए।

रक्षा सचिव हेगसेथले यस अभियानलाई “अपरेसन हकआइक स्ट्राइक” नाम दिँदै भनेका छन्, “यो युद्धको सुरुवात होइन, यो प्रतिशोधको घोषणा हो।” उनले आईएसआईएसका लडाकु, हतियार भण्डार र पूर्वाधार नष्ट गर्नु कारबाहीको मुख्य उद्देश्य रहेको स्पष्ट पारे। उनका अनुसार अमेरिका आफ्ना नागरिक र सैनिकको सुरक्षामा कहिल्यै सम्झौता गर्ने छैन।

CENTCOM ले यो कारबाहीमा जोर्डनका लडाकु विमानहरूले पनि सहभागिता जनाएको पुष्टि गरेको छ। सिरियाभित्रका विभिन्न क्षेत्रमा ठूलो विस्फोटको आवाज सुनिएको स्थानीय तथा मानवअधिकार अनुगमन संस्थाहरूले बताएका छन्।

यो सैन्य कारबाही डिसेम्बर १३ मा पाल्माइरामा भएको आक्रमणको प्रतिक्रियामा गरिएको हो। उक्त आक्रमणमा आयोवा नेसनल गार्डका दुई सैनिक र एक अमेरिकी नागरिक दुभाषेको मृत्यु भएको थियो भने तीन अन्य सैनिक घाइते भएका थिए। CENTCOM का अनुसार आक्रमण एक जना आईएसआईएस बन्दुकधारीले गरेको थियो, जसलाई पछि मारिएको थियो। यी सन् २०१९ पछि सिरियामा मारिएका पहिलो अमेरिकी लडाकु सैनिक हुन्।

अमेरिकी राष्ट्रपति Donald Trump ले आक्रमणपछि जारी गरेको वक्तव्यमा आईएसआईएसविरुद्ध “अत्यन्त कडा र गम्भीर प्रतिशोध” दिइएको बताएका छन्। उनले सिरियास्थित नयाँ सरकारले पनि यस कारबाहीलाई समर्थन गरेको दाबी गरेका छन्।

अमेरिकी गुप्तचर निकायहरूको पछिल्लो मूल्यांकनअनुसार हाल पनि सिरिया र इराकमा १,५०० देखि ३,००० सम्म आईएसआईएस लडाकु सक्रिय छन्। हाल सिरियामा करिब १,००० अमेरिकी सैनिक तैनाथ छन्, जसको मुख्य उद्देश्य आईएसआईएसको पुनःउत्थान रोक्नु हो।

अमेरिकी सेनाले जनाएको अनुसार जुलाईयता अमेरिका र उसका साझेदार बलहरूले सिरिया र इराकमा ८० भन्दा बढी आईएसआईएसविरुद्धका अपरेशन सञ्चालन गरिसकेका छन्। ती कारबाहीमा ११९ जना लडाकु पक्राउ परेका र १४ जना मारिएका छन्। पछिल्लो आक्रमणले आईएसआईएसको बाँकी संरचना कमजोर पार्ने र भविष्यमा अमेरिकी तथा साझेदार बलमाथि आक्रमण गर्ने क्षमतालाई समाप्त गर्ने लक्ष्य राखिएको अमेरिकी पक्षको भनाइ छ।