भारतीय सिनेमाका चर्चित जोडी विजय देवरकोन्डा र रश्मिका मन्दाना विवाहको तयारी गर्दै

काठमाडौँ । भारतीय सिनेमाका चर्चित जोडी विजय देवरकोन्डा र रश्मिका मन्दाना यही फेब्रुअरी २६ मा वैवाहिक बन्धनमा बाँधिने तयारीमा रहेको चर्चा तीव्र बनेको छ । पछिल्ला केही महिनादेखि यी दुई स्टारको विवाहबारे विभिन्न अड्कलबाजी चल्दै आएको थियो, र अब विवाह मिति लगभग तय भएको बताइँदैछ ।

भारतीय सञ्चारमाध्यम इण्डिया टुडेको रिपोर्टअनुसार विवाह समारोह निजी र सीमित उपस्थितिमा आयोजना गरिनेछ । समारोहमा दुवै पक्षका नजिकका परिवारजन र केही छानिएका साथीहरू मात्र सहभागी हुने जनाइएको छ । यद्यपि, दुवै कलाकारले अहिलेसम्म विवाहबारे कुनै आधिकारिक घोषणा गरेका छैनन् । रिपोर्टहरूका अनुसार विवाहका तयारीहरू सुरु भइसकेका छन् । सामाजिक सञ्जालमा सार्वजनिक भएका भिडियो र चर्चाले पनि जोडीले समारोहलाई अत्यन्त निजी राख्न चाहेको संकेत गरेका छन् ।

विवाह राजस्थानको ऐतिहासिक सहर उदयपुर स्थित कुनै दरबार शैलीको भव्य स्थलमा हुने अड्कलबाजी गरिएको छ । तर, विवाहस्थलबारे आधिकारिक पुष्टि भने अहिलेसम्म भएको छैन ।विवाहपछि मार्च ३ वा ४ तारिखतिर रिसेप्सन कार्यक्रम आयोजना गरिने चर्चा पनि चलेको छ । उक्त कार्यक्रम हैदराबाद वा बञ्जारा हिल्स क्षेत्रका कुनै प्रिमियम स्थलमा हुन सक्ने बताइए पनि यसबारे पनि आधिकारिक जानकारी सार्वजनिक गरिएको छैन ।

विवाहको खबर सार्वजनिक भएसँगै सामाजिक सञ्जालमा फ्यान तथा सेलिब्रेटीहरूले शुभकामना व्यक्त गरिरहेका छन् । धेरैले यो जोडीलाई लामो समयदेखि मन पराउँदै आएका थिए र उनीहरूको सम्बन्ध विवाहसम्म पुग्दा खुसी व्यक्त गरेका छन् । यद्यपि, विवाह निम्तो र सहभागी कलाकारहरूको सूचीबारे अझै स्पष्ट विवरण आउन बाँकी रहेको छ । विजय र रश्मिका २०१८ र २०१९ मा फिल्म गीथा गोविन्दम र डियर कमरेड फिल्ममा एक साथ काम गर्दा प्रेममा परेको बताइएको छ । उनीहरुले २०२५ अक्टोबर ३ मा गोप्य रुपमा इन्गेजमेन्ट गरेको दाबि गरिएको छ ।